Ang malungkot na insidente ng sunog sa Purok 5, Barangay Dalahican, Lucena City noong Sabado ay nagresulta sa pagkasawi ng dalawang bata na edad isa at dalawang taon.
Ayon sa imbestigasyon, iniwan umano ng kanilang ina ang mga bata sa bahay upang bumili ng langis ng niyog para sa kanilang ginawang lampara, dahil walang kuryente sa lugar.
Bago pa man dumating ang mga bumbero, nagtulungan ang mga kapitbahay gamit ang bucket relay upang maapula ang apoy at maiwasan ang pagkalat nito sa iba pang bahay.
Isa sa mga bata ang natagpuang wala nang buhay sa kwarto, habang ang isa naman ay nasagip ng mga residente ngunit idineklarang patay pagdating sa ospital. Wala namang ibang nasugatan sa insidente.
Si City Fire Marshal Supt. Elias Baguio III ay muling nagpaalala sa lahat na maging maingat sa paggamit ng apoy o lampara, at huwag iwanang mag-isa ang mga bata sa loob ng bahay upang maiwasan ang ganitong trahedya.
