Ipinahayag ng aktres at content creator na si Bea Borres ang kanyang matapang na paninindigan matapos makatanggap ng hate comment laban sa kanyang bagong silang na sanggol. Sa isang post sa social media, diretsahan niyang sinagot ang netizen at ibinahagi ang screenshot ng bastos na pahayag bilang tugon sa hindi kanais-nais na komento.
Ipinanganak ni Bea ang kanyang anak noong Disyembre 15, ngunit kamakailan lamang niya ito ibinahagi sa publiko, dahilan upang ikinagulat ng marami. Sa mga larawang inilabas niya tungkol sa kanyang anak na si baby Hope, pinili ng celebrity mom na huwag munang ipakita ang mukha nito upang mapanatili ang privacy at kaligtasan ng kanyang anak.
Isang netizen ang nagbigay ng malisyosong haka-haka at nagsabing ikinahihiya umano ni Bea ang itsura ng kanyang sanggol. Nilinaw ni Bea na ang desisyon niyang huwag munang ilantad ang mukha ng bata ay bahagi ng kanyang pagiging mapagprotekta bilang ina, at iilan lamang sa pamilya at malalapit na kaibigan ang may access sa mga larawan nito.
Mariin din niyang binalaan ang mga nakatanggap ng larawan ng kanyang anak na huwag itong ipakalat. Binigyang-diin niya na handa siyang harapin ang anumang isyu laban sa kanya, ngunit hindi niya hahayaang masangkot ang kanyang anak. Para kay Bea, ang kapayapaan at kaligtasan ni baby Hope ang pinakamahalaga.
Umani naman ng suporta ang pahayag ni Bea mula sa kanyang mga tagahanga, na pinuri ang kanyang lakas at malasakit bilang ina. Mas lalo itong tumimo sa publiko matapos ibahagi ni Bea na ang kanyang unang anak ay gumugol ng 44 na araw sa NICU, patunay ng katatagan ni baby Hope at ng walang kapantay na pagmamahal ng isang ina.
