Suportado ng Apostolic Nuncio sa Pilipinas ang grupo ng kabataang Filipino Catholics na gumagamit ng online gaming platform na Roblox para sa pagpapalaganap ng pananampalataya at pagbubuo ng komunidad. Tinawag ng Nuncio na si Archbishop Charles J. Brown ang inisyatibang ito bilang isang "welcome sign of progress" sa pag-engage ng kabataan sa buhay ng Simbahan.
Sa pagdiriwang ng ika-5 anibersaryo ng Roblox Filipino Catholics (RFC), pinuri ni Archbishop Brown ang grupo sa kanilang paglikha ng virtual simulation ng Pista ng Itim na Nazareno, na nagbibigay-daan sa mga deboto na hindi makadalo sa taunang prusisyon sa Quiapo na makibahagi sa selebrasyon nang may kabuluhan.
Binanggit ni Brown na ang virtual social hub ng RFC ay puwede maging espasyo para sa pagpapalakas ng loob at koneksyon, lalo na sa mga nangangailangan ng suporta at pagkakaibigan. Ayon sa kanya, ang mga online na interaksyon ay puwedeng humantong sa tunay na pagkakaibigan at mas matibay na komunidad.
Tinukoy ng nuncio ang encyclical Fratelli Tutti ni Pope Francis, at binigyang-diin ang kahalagahan ng pagkilala sa dignity ng bawat tao, sa lahat ng oras at lugar. Binanggit din niya ang mensahe ni Pope Leo XIV sa kabataan, na hikayatin silang magsikap sa kabanalan at masayang ipakita ang kanilang pananampalataya kahit saan sila naroroon.
Sa kanilang tugon, ipinahayag ng leadership ng RFC ang pasasalamat sa pagkilala, at tinukoy ito bilang patunay ng creativity at faith ng kabataang Pilipino sa paghahanap ng presensya ng Diyos kahit sa digital na mundo. Mula sa unang 100 miyembro noong 2021, lumago ang RFC sa mahigit 6,000 miyembro, aktibong nakikilahok sa mga diskusyon at aktibidad, kabilang ang Virtual Traslacion at Virtual Sinulog, na lalong nagpalawak ng kanilang abot at impluwensya.
