Ang gusto ko lang ay maglabas ng sama ng loob. Ako si Carla, 32-anyos, may asawa pero wala pa kaming anak. Dati maayos naman ang takbo ng buhay namin, pero mula nang mawalan ng trabaho ang mister ko, bigla kaming nahirapan. Ako na lang ang kumakayod habang siya naman ay walang tigil na naghahanap ng trabaho. Apat na buwan na kaming atrasado sa renta at halos araw-araw ay kinakabahan ako na baka paalisin kami ng landlord.
Napakabastos ng may-ari ng apartment na inuupahan namin. Sinabi niya na ubos na ang aming two months advance at two months deposit kaya dapat na raw kaming umalis. Ginagawa naman namin lahat para makahanap ng pambayad, pero kulang talaga ang kinikita ko. Kaya bawat araw ay sobrang bigat ng dinadala ko—hindi ko alam kung saan pa kami kukuha ng pera.
Isang araw, dumating siya habang wala ang mister ko. Hindi ko akalain ang sinabi niya. Sabi niya, kahit hindi na raw kami magbayad ng apat na buwang atrasong ₱15,000, puwede pa rin daw kaming tumira sa apartment… pero kapalit nito ay ang katawan ko. Para akong binuhusan ng malamig na tubig. Nagpantig ang tenga ko, hindi ko napigilang murahin siya at palayasin sa harap ng bahay. Hindi ko akalaing magagawa niya sa akin ang ganoong kalaswaan.
Sakto namang dumating ang asawa ko na may dalang pera. Nakautang siya ng ₱15,000 para pambayad sa atrasong renta. Hindi ko masabi sa kanya ang nangyari dahil ayaw kong magkaroon ng gulo. Alam ko kasi na baka hindi niya kayanin ang marinig at baka biglang magwala laban sa landlord. Kaya ang ginawa ko, nagpakabit ako ng CCTV sa sala para may ebidensya ako kung sakali ulitin niya ang kalaswaan niya. At totoo nga, doon na-record ang mga bastos niyang sinasabi.
Ngayon, naguguluhan ako kung sasabihin ko na ba sa mister ko. May ebidensya na ako, at malinaw na sexual harassment ang ginawa niya. Alam kong dapat itong ipaglaban, pero natatakot din ako sa magiging resulta. Ayokong lumala ang sitwasyon, pero alam ko na kapag hindi ko ito pinanindigan, baka ulitin pa niya ito sa ibang babae.
Hindi dapat palampasin ang ganitong kabastusan. Ang paglapastangan sa kababaihan ay hindi dapat itikom ang bibig. Kahit mahirap ang buhay, hindi dahilan para abusuhin ang tulad ko na nagsusumikap lang para sa pamilya. Ngayon, iniisip ko nang sabihin sa asawa ko ang buong nangyari at sabay kaming magsampa ng reklamo. Ang totoo, hindi lang ito laban ko—laban ito ng lahat ng babaeng nakakaranas ng ganoong klaseng pang-aabuso.
