Ang gusto ko lang po ay maglabas ng sama ng loob. Ako po ay isang 25 years old na babae, at nasa 4-year relationship ako ngayon. Sobrang swerte ko kasi ang boyfriend ko ay ideal guy—mabait, responsable, at lahat ng magandang katangian nasa kanya. Masaya po kami, live-in na rin kami, at masasabi kong kontento na ako sa buhay namin.
Pero ang hindi ko maintindihan, bakit parang ako pa ang ginagawan ng issue ng girlfriend ng ex ng boyfriend ko. Ang ex ko po ay matagal ko nang nakahiwalay—5 years na kaming break. Wala kaming communication, wala kaming contact, wala na talagang kahit anong koneksyon. Pero itong girlfriend ng ex ko, parang obsessed sa akin kasi palagi siyang nangpupuna at naninira sa Facebook. Literal na parinig nang parinig tungkol sa akin, kahit wala naman akong ginagawa.
Ang pinakamasakit, kung ano-anong paninira ang pinopost niya. Sinasabi niyang ako daw ang naghahabol sa boyfriend niya. Kesyo pangit daw ako, kesyo lahat ng kapintasan ko, inilalabas niya online. Tapos siya naman, todo ang pagyayabang sa ganda niya. Pero honestly, wala akong pakialam sa ganda niya—lahat naman tayo may kanya-kanyang ganda. At hindi ko naman kailangan makipagkumpara dahil secure ako sa sarili ko at masaya ako sa boyfriend ko ngayon.
Siguro ang isa pang ikina-iinit ng ulo niya ay yung pagiging close ko sa family ng ex ko. Simula pa dati, close na talaga kami ng pamilya nila, lalo na yung kapatid ng ex ko. Para na kaming magkapatid hanggang ngayon. Normal lang para sa amin na magkita at magkausap dahil matagal na kaming magkakaibigan. Pero siya, hindi niya matanggap yun. Ang ending, kahit pamilya ng ex ko, nakaaway niya. Magulang ng ex ko, hindi rin siya gusto. Halos lahat ng tao sa side ng ex niya, hindi siya kasundo.
Dahil sa attitude niya, pati ako nadadamay. Kahit wala akong balak makisawsaw, ako ang target ng galit niya. Ni minsan, hindi ko naisip na balikan ang ex ko. Wala na talaga akong feelings, wala na akong pakialam. Pero bakit ako ang pinaparinigan niya at inaaway niya sa halip na ayusin ang relasyon nila?
Hanggang sa dumating yung punto na pina-barangay ko siya. Mga dalawang taon na ang nakakalipas yun, kasi sobrang grabe na talaga yung pang-aaway niya. Akala ko titigil na siya pagkatapos, pero hindi. Ang ending, ako pa ang lumabas na masama, siya pa ang nagpa-victim at nagpaawa sa lahat. Imbes na tumigil, lalo pang lumala. Para siyang aso na walang tigil sa kakatahol, at ako yung lagi niyang target.
Ngayon, pagod na pagod na ako sa sitwasyon. Ang gusto ko lang naman ay manahimik at maging masaya kasama ang boyfriend ko. Pero bakit parang lagi akong nadadamay sa problema ng ibang tao? Hindi ko na alam kung ano pa ang dapat gawin.
Kung kayo po ang nasa sitwasyon ko, ano ang gagawin ninyo? Paano ba haharapin ang taong galit na galit sa’yo kahit wala ka namang ginagawa?
