Ang Senador Ping Lacson ang bagong chair ng Blue Ribbon Committee, kapalit ni Senador Rodante Marcoleta. Naganap ito matapos ang pagbabago ng pamunuan sa Senado kung saan napatalsik si Senador Chiz Escudero at napalitan ni Tito Sotto bilang bagong Senate President.
Ayon kay Sotto, hindi kabilang si Marcoleta sa mayorya, at nakalaan lamang ang Blue Ribbon para sa mga miyembro nito. Kaya si Lacson ang opisyal na pumalit. Samantala, si Senador Win Gatchalian ay mananatili bilang chair ng Finance Committee.
Ang Blue Ribbon Committee ang nagsisiyasat sa mga alegasyon ng katiwalian. Sa kasalukuyan, pangunahing iniimbestigahan ang malaking anomalya sa flood control projects na tinatayang nagkakahalaga ng mahigit ₱1 trilyon. Si Lacson mismo ang unang nagbunyag na napakalaking pondo ang posibleng nawaldas sa katiwalian.
Nakakuha ng batikos si Marcoleta sa paraan ng kanyang paghawak sa mga hearing. May mga senador na nagsabing hindi patas ang pagbibigay niya ng oras sa pagtatanong, at tila may mga taong hindi niya tinatanong nang buo, kabilang ang ilang contractor na konektado sa mga nakaraang opisyal.
Ngayon, hawak na ni Lacson ang komite na inaasahang magbibigay ng mas seryosong direksyon sa imbestigasyon laban sa mga ghost projects sa flood control na umaabot sa bilyon-bilyong piso ang nawawala.
