Ang tatlong billboards ay bumagsak sa North Luzon Expressway (NLEX) sa Bocaue, Bulacan noong Martes ng hapon dahil sa malakas na hangin at matinding ulan mula sa localized thunderstorm.
Ayon sa ulat, nangyari ang insidente bandang 3:30 p.m. matapos maglabas ng advisory ang PAGASA tungkol sa “intense to torrential rainshowers na may kidlat at malakas na hangin” sa Bocaue at karatig na lugar.
Sinabi ni Barangay Tambubong secretary Jean Lazaro na isang ipo-ipo ang nagdulot ng pagbagsak ng billboards na nakatayo sa tabi ng ginagawang bypass road. “Hindi kinaya ng mga billboards, sobrang lakas ng hangin dito sa area,” dagdag niya.
Wala namang naitalang nasugatan o nasirang bahay at kuryente. Hindi rin bumagsak ang billboards sa expressway o kabahayan. Nagpayo ang barangay na i-roll up muna ng ibang operator ang kanilang tarpaulins bilang pag-iingat.
Samantala, inihayag ng grupo ng advertisers na nakikipag-ugnayan sila sa mga lokal na awtoridad at site operators para matiyak ang kaligtasan ng publiko. Hanggang alas-7:30 ng gabi, hindi pa nasisimulan ang clearing operations sa lugar.
