Ang BYD ay muling gumawa ng kasaysayan matapos ang kanilang premium sub-brand na Yangwang U9X (Xtreme) ay nakapagtala ng bagong record bilang pinakamabilis na production car sa mundo. Sa isang test track sa Germany, umabot ito sa 496.22 km/h (308.4 mph) o halos ₱13.6 milyon multa kung speeding fine sa bilis na iyon!
Noong nakaraang Agosto, ang U9X ay kinilala na rin bilang pinakamabilis na EV matapos maabot ang 490.484 km/h (304.48 mph). Limitado lang ang produksyon ng hypercar na ito, na 30 units lang ang gagawin sa buong mundo. Ang “X” ay nangangahulugang “Extreme”, pero sinadya rin ito ng BYD para ipakita ang pag-explore at inobasyon na dala ng kanilang teknolohiya.
Gumagamit ang U9X ng parehong arkitektura ng U9 hypercar na binebenta sa China. Mayroon itong 1200-volt ultra-high-voltage system (mas mataas kaysa 800V), LiFePO4 Blade Battery na may mataas na discharge rate, apat na high-speed motors na abot hanggang 30,000 rpm at nagbibigay ng mahigit 3000 horsepower, pati na rin track-level semi-slick tires at DiSus-X suspension na espesyal na tinono para sa matinding bilis.
Ayon kay Stella Li, Executive VP ng BYD: “Ito ay napakapinagmamalaking sandali para sa aming R&D team. Ang Yangwang ay brand na walang kinikilalang imposible. Salamat sa buong team at kay driver Marc Basseng na nagbigay ng husay at tiwala. Ngayon, ang pinakamabilis na production car sa mundo ay electric.”
Si Marc Basseng, isang German racing driver, ang nagmaneho sa U9X sa record-breaking run. Aniya: “Ang performance ng U9X ay kakaiba. Hindi magagawa ng combustion engine ang ganitong bilis. Dahil sa electric motor, mas tahimik ang takbo at mas nakakapokus ako sa track.”
