Ang batang gymnast na si Eldrew Yulo ay nagtapos sa ika-8 puwesto sa men’s individual all-around ng 3rd FIG Artistic Gymnastics Junior World Championships na ginanap sa Pasay City. Umangat siya hanggang ika-2 puwesto matapos ang napakagandang floor exercise kung saan nakakuha siya ng 14.300 puntos.
Pero bumaba ang kanyang overall standing matapos magkaroon ng mababang scores sa pommel horse at rings, pati na rin ang pagdulas sa dismount ng parallel bars. Kahit nahirapan at nakaranas ng ankle sprain, ipinagpatuloy pa rin ni Yulo ang laban at nagpakita ng tapang. Ayon sa kanya, proud pa rin siya dahil mula 15th place sa qualifiers, umangat siya sa 8th place.
Ayon naman sa Gymnastics Association of the Philippines, maganda pa rin ang naging takbo ni Yulo at malaking bagay na kabilang siya sa Top 8 sa buong mundo. Buo ang tiwala ng grupo na kaya pa niyang makakuha ng ginto sa mga susunod na events tulad ng floor, vault, at high bar.
