The plastic waste ang pinakamaraming uri ng basura na iniwan ng mga bumisita sa mga sementeryo ngayong Undas 2025, ayon sa ulat ng EcoWaste Coalition. Kabilang sa mga nakitang basura ay mga plastic bag, bote, baso, kutsara’t tinidor, straw, at mga styrofoam na lalagyan ng pagkain at inumin.
Ayon kay Ochie Tolentino, campaigner ng grupo, ang single-use plastics (SUPs) ay gawa sa fossil fuels at kadalasang ginagamit lang minsan. Hirap itong i-recycle at nakakasira ng kalikasan. Dagdag pa niya, ang paggamit ng SUPs ay may koneksyon sa climate change, polusyon, at pagkawala ng biodiversity.
Sa kanilang pagmamanman mula Oktubre 31 hanggang Nobyembre 2, sinuri ng grupo ang 25 pampubliko at pribadong sementeryo gaya ng Manila North at South Cemetery. Napansin nilang bahagyang bumuti ang pamamahala sa basura sa loob ng mga sementeryo dahil sa mas maraming street sweepers, 24/7 cleanup, at mas malinaw na segregation signage.
Gayunman, napuno pa rin ng halo-halong basura ang mga kalsada sa paligid ng sementeryo, lalo na noong Nobyembre 1 at umaga ng Nobyembre 2. Karamihan sa mga ito ay mga balot ng pagkain at food waste.
Nanawagan ang grupo ng tatlong hakbang para tuluyang mabawasan ang basura tuwing Undas: ang pag-phase out ng single-use plastics, mahigpit na pagpapatupad ng mga lokal na plastic ban ordinances, at pagsunod sa Republic Act 9003 o ang Ecological Solid Waste Management Act. Sinabi rin ni Tolentino na mahalagang mahiwalay ang bawat uri ng basura upang mapadali ang recycling at mabawasan ang basura sa landfill.