Ang Land Transportation Office (LTO) ay sumusuporta sa plano na gawing mandatory ang e-bike registration sa buong bansa. Dahil sa mabilis na pagdami ng mga e-bike, mas lumalakas din ang panawagan para sa mas maayos na regulasyon sa paggamit nito.
Dumami ang bentahan ng e-bike sa Pilipinas dahil mas mura ang gastos sa kuryente kumpara sa gasolina. Marami rin ang gumagamit nito dahil hindi kailangan ng lisensya o rehistro, kaya naging paboritong sasakyan ng maraming Pilipino sa lungsod at probinsya.
Ngunit dahil sa kakulangan ng mahigpit na batas, nagkaroon ng mga problema sa kaligtasan sa kalsada. Madalas makita ang mga batang walang training na nagmamaneho ng e-bike, lumalabag sa mga batas trapiko, at minsan ay pumapasok pa sa mga highway.
Ayon kay LTO Executive Director Atty. Greg Pua, dapat nang iparehistro ang e-bike para magkaroon ito ng unique identification tulad ng chassis at motor number, upang ma-assign-an ng plate number. Sa ganitong paraan, mas madali ring matukoy ang mga lumalabag sa batas.
Naghihintay pa ang LTO ng opisyal na direktiba mula sa Department of Transportation, pero malinaw na layunin nila na gawing mas ligtas at maayos ang paggamit ng e-bike sa buong bansa.
