Ang isang Cessna 172 plane na may tail number RPC 2211 ay bumagsak sa isang bukirin malapit sa Iba Airport sa Zambales noong Biyernes ng umaga. Ayon sa ulat ng pulisya, apat na katao ang nasugatan sa insidente.
Kabilang sa mga nasugatan ay flight instructor na si Capt. Jacques Robert Papio at mga student pilot na sina Angelo Josh Quinsayas, Kisses Nunez Althea, at Jericho Bernardo Palma. Lahat sila ay agad dinala sa Ramon Magsaysay Hospital at ngayon ay stable na ang kondisyon.
Ayon kay P/Brig. Gen. Jason Capoy ng PNP Aviation Security Group, ang eroplano ay pag-aari ng Skyaero Trade na naka-base sa Zambales. Ito ay nasa isang training flight at umalis sa Iba Airport bandang 8:57 a.m.
Dakong 9:30 a.m., ang eroplano ay bumagsak sa Purok 4, Sitio Corocan, Brgy. Lipay-Dingin-Panibutan, Iba, Zambales. Iniimbestigahan na ngayon ng CAAP Aircraft Accident Investigation Board ang sanhi ng pagbagsak, ayon kay CAAP Director General Raul Del Rosario.
