Ang isang call center agent ay nawalan ng cellphone matapos hablutin ito ng isang riding-in-tandem habang naghihintay siya ng masasakyan sa Barangay San Jose, Rodriguez, Rizal noong Biyernes ng gabi, Hunyo 20, 2025. Kitang-kita sa CCTV ang pangyayari kung saan dalawang babaeng empleyado ang nasa gilid ng kalsada sa Riverside area nang biglang dumating ang mga suspek.
Agad na tumakas ang mga snatcher matapos makuha ang cellphone, pero may nakasalubong silang mga nagpapatrolyang pulis. Isang concerned rider ang nagbigay ng impormasyon sa mga pulis tungkol sa insidente kaya agad silang rumesponde.
Nahuli ang isa sa mga suspek matapos tumalon sa motor, at sa pamamagitan ng follow-up operation, natunton din ang kasama niyang rider. Nabawi ang cellphone pati na rin ang motorsiklo na ginamit sa krimen. Napag-alamang dati na rin silang nakulong dahil sa droga at kabilang na sa barangay watchlist.
Ang dalawang suspek, edad 24 at 20, ay magkaibigan at mga residente ng Barangay San Isidro. Isa sa kanila ay nagsabi na, “Naggagala lang po kami noon. Sa korte na lang po ako magpapaliwanag.”
Kasalukuyang nakakulong ang dalawa sa Rodriguez Municipal Police Station at haharap sa kasong Robbery/Snatching.
