Ang Metropolitan Manila Development Authority o MMDA ay nakipagpulong kamakailan sa motorcycle community para pag-usapan ang mga isyu gaya ng No Contact Apprehension Policy (NCAP), motorcycle lane rules, at traffic violations. Isa sa mga mainit na pinag-usapan ay ang MC Lane sa Commonwealth Avenue, Quezon City.
Maraming riders ang nagreklamo na naging mas matagal ang biyahe nila, umaabot ng isang oras ang dagdag sa rush hour. Bukod dito, sinabi nilang delikado ang MC Lane dahil parang nagsisiksikan sila gaya ng sardinas, na nagdudulot ng peligro ng aksidente kahit maliit lang ang pagkakamali.
Ipinanukala ng MMDA Chairman Atty. Don Artes ang paghahati sa MC Lane sa 3 hanggang 4 na linya para mas ligtas at maayos ang daloy. Isa rin sa mga opsyon ay ang pagbawas ng 5-meter bike lane ng kalahati para mapalawak ang daanan ng mga motorsiklo.
May apat na opsyon ang MMDA: una, bawasan ang bike lane at palawakin ang MC Lane. Ikalawa, ilipat ang MC Lane malapit sa MRT-7 at gamitin ang lane ng private vehicles. Ikatlo, tuluyang alisin ang bike lane para mas lumawak ang PUV at MC Lane. Ikaapat, hatiin ang bike lane at ibigay ang kalahati para sa mga MC taxi at courier riders habang ang ibang riders ay sa dati pa ring MC Lane dadaan.
Ang MC Lane ay ibinalik noong 2023, at higit 1,300 violations ang naitala sa unang araw. Nilinaw ng MMDA na ang mga big bikes na may 400cc pataas ay hindi sakop ng MC Lane rule.
