Ang epekto ng kaguluhan sa Gitnang Silangan sa ekonomiya ng Pilipinas ay minimal pa sa ngayon, ayon sa energy officer-in-charge na si Sharon Garin. Naganap ang pagpupulong kahapon sa Malacañang kung saan tinalakay ni Pangulong Ferdinand Marcos Jr. at ng kanyang economic team ang posibleng epekto ng giyera sa pagitan ng Israel at Iran, lalo na sa presyo ng langis at epekto nito sa mahihirap na sektor.
Ayon kay Garin, bumaba ang presyo ng langis mula $70 patungong $69 kada bariles matapos ang inihayag na pansamantalang ceasefire ni US President Donald Trump. Habang nananatiling pabagu-bago ang sitwasyon sa Gitnang Silangan, tiniyak ni Garin na ang epekto sa ekonomiya ay hindi nakakabahala kung hindi lalala ang tensyon.
Pinaghandaan ng gobyerno ang pinakamasamang posibleng senaryo—ang pagsasara ng Strait of Hormuz, na maaaring magdulot ng oil supply shortage. Ngunit ayon sa DOE, may mga ibang ruta at alternatibong sources tulad ng US, Canada, at Brazil na maaaring magamit ng Pilipinas sakaling mangyari ito.
Nakahanda rin ang gobyerno na magbigay ng ayuda sa transport at agrikultura kung tataas ang presyo ng langis sa lagpas $80 kada bariles. May nakalaang P2.5 bilyon na pondo para sa tulong sa mga tsuper upang hindi na itaas ang pasahe. May oil company na rin na nagbigay ng P1/litro na diskwento para sa mga PUV drivers.
Tungkol naman sa panawagang alisin ang excise at VAT sa langis, sinabi ni Garin na ito ay nakasaad sa batas at kailangan ng aksyon mula sa Kongreso. Ang buwis mula sa langis ay umaabot sa P300 bilyon, na ginagamit sa mga kalsada, paaralan at serbisyong pangkalusugan. Kaya’t mas pinili muna ng gobyerno ang ayuda bilang agarang tugon habang nakaabang sa sitwasyon sa Gitnang Silangan.
