Ang dalawang suspek sa pagnanakaw ng isang gintong inidoro noong 2019 ay hinatulan ng korte sa Oxford. Naganap ang krimen sa Blenheim Palace, ang lugar kung saan ipinanganak si Winston Churchill. Ayon sa imbestigasyon, si James Sheen, 40 taong gulang, ang gumamit ng maso para alisin ang inidoro. Siya ay sinentensiyahan ng apat na taon na idadagdag sa dati na niyang 19 taon at 4 na buwang pagkakabilanggo dahil sa ibang kaso tulad ng panloloob sa mga ATM at museo.
Si Michael Jones, 39, ay hinatulan naman ng 27 buwang pagkakakulong. Ayon sa hukom, hindi tiyak kung kasama siya sa mismong pagnanakaw, pero napatunayang nagbantay siya sa lugar bago ito manakaw. Isang araw bago ang insidente, sinubukan pa raw niya ang inidoro at sinabing ito ay "napakasarap gamitin."
Ang inidoro ay gawa sa purong ginto at tinatayang nagkakahalaga ng £4.75 milyon o ₱450 milyon. Matapos manakaw, pinaniniwalaang ito ay tinunaw o pinaghiwa-hiwalay at agad na ibinenta. Isa pa sa mga miyembro ng grupo ay nahatulan na rin.
Ang nasabing inidoro ay likha ng artist na si Maurizio Cattelan. Bago ito ninakaw, naka-display ito sa Guggenheim Museum sa New York. Inalok pa ito noon kay US President Donald Trump bilang utang, pero tinanggihan ng White House. Mas gusto raw nila ng painting ni Van Gogh.
Si Cattelan din ang gumawa ng viral artwork na isang saging na dinikit sa pader gamit ang duct tape. Nabenta ito noong 2024 sa halagang $6.2 milyon sa isang auction sa New York.
