Ang isang 5-taong gulang na batang babae ay malubhang nasugatan matapos siyang barilin ng hindi pa kilalang salarin habang naglalaro sa terrace ng kanilang bahay sa Brgy. Ayuti, Lucban, Quezon.
Kasama ng biktimang si alyas “Jane” ang kanyang kapatid na lalaki nang dumating ang suspek na nakasuot ng pulang hoodie at sakay ng Honda Click na motorsiklo. Bigla na lamang itong nagpaputok ng baril bandang 1:50 ng hapon, gamit ang caliber .45, at tinamaan ang bata sa kanang braso at tiyan.
Agad na dinala si Jane sa MMG Hospital para sa gamutan. Tumakas naman ang suspek pagkatapos ng pamamaril, at hinahabol na ngayon ng mga otoridad.
Tinitingnan ng pulisya ang posibilidad na may personal na galit sa ama ng bata, na isa umanong pulis, kaya posibleng ang anak ang pinuntirya bilang ganti.
Patuloy ang imbestigasyon ng Lucban PNP upang matukoy kung sino ang nasa likod ng karumaldumal na krimen at ano ang totoong motibo sa pamamaril.
