Ang OPM artist na si Amiel Sol ay labis pa rin ang tuwa matapos umabot sa 100 million streams sa Spotify ang kanyang kantang “Sa Bawat Sandali.” Walang inaasahan si Amiel nang sinulat niya ang kanta. Para sa kanya, ang mahalaga ay makapagsulat ng tapat at galing sa puso, kahit pa may mga linya na “cringe” sa iba.
Lumaki si Amiel sa pamilyang mahilig sa musika. Nagsimula siya sa pag-gitara noong walong taong gulang at nakahiligan ang musika sa simbahan, school bands, at mga gig sa restobar. Kahit may talent siya sa pagkanta, ang tingin niya sa sarili ay isang songwriter na kumakanta lang ng sariling gawa. Hindi rin siya sumali kailanman sa singing contests.
Noong Disyembre 2024, inilabas niya ang “Sa Bawat Sandali,” at sa loob lang ng ilang buwan, naging viral ito — salamat na rin sa TikTok at sa suporta ng mga tagapakinig. Mula sa pagiging data analyst, nag-resign si Amiel para tutukan ang kanyang music career. Sa ngayon, may plano siyang maglabas ng EP at tumugtog sa mas maraming live shows, kabilang na ang concert ng “Mutya OST” sa June 20.
Aminado si Amiel na minsan naiisip niya kung hanggang kailan ang tagumpay, pero pinipili niyang mag-focus sa kasalukuyan. Para sa kanya, ang tunay na reward ay ang proseso ng pagsusulat. Nagpapasalamat siya sa kanyang label, team, at sa mga fans na tinatawag na Solmates. Aniya, “Wala ako sa posisyon na ‘to kung wala kayo.”
