Ang isang museo sa Verona, Italy ay naghahanap ngayon ng dalawang turista na sangkot sa pagkasira ng isang mamahaling artwork. Sa video na kuha mula sa Palazzo Maffei Museum, makikita ang dalawang turista na nagpapalitan ng kuha habang nagpo-pose sa isang upuang may Swarovski crystals na gawa ng artist na si Nicola Bolla.
Habang ang babae ay bahagyang umupo nang hindi hinahawakan ang upuan, umupo naman ang lalaki at nadulas pabalik na naging dahilan ng pagkabasag ng likhang sining. Ang upuang kilala bilang Van Gogh’s Chair ay isang napakadelikadong art piece, ayon sa museo. Matapos mangyari ang insidente, agad na tumakbo palabas ang dalawa at hindi na muling bumalik.
Ayon sa pamunuan ng museo, naayos na ang upuan at nagsampa na sila ng reklamo sa pulisya. Sinabi naman ni Bolla, ang artist, na “Isa itong kahangalan, pero para sa akin, may konting positibong bahagi rin ito—parang isang performance art mula sa ordinaryong tao.”
