Ang isang 31-anyos na lalaki na si Alvin “Nano” Dela Cruz ay nasawi matapos siyang mapagkamalang akyat-bahay at barilin ng kanyang 72-anyos na kapitbahay sa Barangay Maybunga, Pasig City noong madaling araw ng Mayo 13. Ayon sa CCTV, pumasok si Nano sa eskenita malapit sa bahay ng suspek—na agad nagduda sa kanya.
Isang testigo ang nagsabing may mainit na pagtatalo sa pagitan ng dalawa. Kasunod nito, naglabas ng baril ang matanda habang ang kanyang mga apo ay may dalang pamalo. Tinamaan si Nano sa tagiliran at narinig pang nagmamakaawa para sa kanyang buhay. "May anak ako, dalawang taon," aniya, ngunit hindi ito pinakinggan.
Dumating din ang kapatid ng biktima at sinubukang ayusin ang gulo, pero tinutukan siya ng baril. Sa kanyang pagtalikod, umalingawngaw ang putok. Agad siyang humingi ng tulong sa barangay. Nang bumalik sila sa lugar, natagpuang nakadapa at wala nang buhay si Nano.
Ayon sa live-in partner ni Nano, hindi siya magnanakaw. Wala rin siyang dalang armas sa CCTV. “Baka may hinahanap lang siya roon,” sabi niya. Napagkamalan lang daw talaga ito ng matanda. Dagdag pa niya, “Walang record ang partner ko ng gulo sa Maybunga.”
Hustisya ang sigaw ng pamilya ni Nano. Iniwan niya ang kanyang dalawang taong gulang na anak. Sumuko naman ang suspek ilang oras pagkatapos ng insidente at ngayon ay nahaharap sa kasong homicide.
