Ang Bureau of Internal Revenue (BIR) ay nagpaalala sa mga kandidato sa lokal at nasyonal na kailangang i-deklara ang mga hindi nagamit na campaign funds para ito’y mabuwisan. Ayon kay BIR Commissioner Romeo Lumagui, walang problema kung itatabi ng kandidato ang sobrang pondo basta’t magbayad ng income tax.
Bago magsimula ang kampanya noong Marso, naglabas na ang BIR ng mga patakaran, kabilang na ang 5% withholding tax sa mga gastusin ng mga kandidato at party-list. Lahat ng gastusin na sakop ng buwis ay itinuturing na nagamit na campaign funds.
Pagkatapos ng eleksyon, kailangang magsumite ng Statement of Contributions and Expenditures (SOCE) sa Commission on Elections (Comelec) ang bawat kandidato. Kung hindi ito maisusumite, puwedeng patawan ng parusa at makasuhan ng tax evasion, dagdag ni Lumagui.
Bukod pa rito, umabot sa 33 tonelada ng illegal campaign posters ang inalis mula Pebrero 11 hanggang Abril, ayon sa MMDA. Kasama sa tinanggal ang mga poster sa poste, puno, tulay, at iba pang bawal na lugar bilang bahagi ng Comelec Oplan Baklas.
