The Bagyong Opong ay nagdulot ng matinding pinsala sa Oriental Mindoro kung saan libo-libong pamilya ang nawalan ng tirahan. Ayon sa Provincial Disaster Risk Reduction and Management Council (PDRRMC), nasa 4,550 na bahay ang bahagyang napinsala at 618 naman ang tuluyang nawasak sa iba’t ibang bayan ng probinsya.
Isa sa mga labis na naapektuhan ay si Abelardo Sol, 79 anyos mula sa Pola. Noong Agosto lamang ay pumanaw ang kanyang asawa dahil sa matinding karamdaman. Ngayon, nawalan pa siya ng bahay matapos sirain ng malakas na hangin ng Bagyong Opong ang kanyang tahanan. Kasama lamang niya ngayon ang kanyang alagang aso at hirap siyang makapaghanapbuhay bilang magsasaka dahil sa kanyang hika. Ang tanging hiling niya ay muling makapagtayo ng bahay.
Sa bayan ng Matulatula, gumuho ang bahay ni Edilberto Aguilar. Kasama niya rito ang kanyang asawang si Nita, na may iniindang sakit sa pagkaparalisa, at kanilang apo. Wala na rin silang pagkukunan ng kita matapos masira ng bagyo ang kanilang taniman ng saging. Aabutin pa ng anim na buwan bago muling makabawi ang kanilang pananim. Ang hiling nila ngayon ay simpleng bahay, pagkain, at kaunting pera para makapagpagamot.
Nagbigay ng paunang tulong ang lokal na pamahalaan tulad ng bigas at food packs. Nangako rin sila ng emergency shelter assistance para sa mga nawalan ng bahay. Samantala, sa bayan ng Mansalay kung saan unang tumama ang bagyo, umabot ng halos apat na oras ang malalakas na hangin. Humihiling ang lokal na pamahalaan ng yero, pagkain, at tulong pinansyal lalo na’t kailangan ng mga mag-aaral para sa bayarin sa eskwela.
Umabot na sa ₱895 milyon ang pinsala sa agrikultura, kabilang ang malawak na taniman ng saging at palay. Samantala, nasa ₱145 milyon naman ang pinsala sa mga imprastraktura. Sa ngayon, mahigit 60,183 pamilya o 207,232 katao ang apektado ng Bagyong Opong. Nakatakda ring magdeklara ng state of calamity ang Oriental Mindoro dahil sa lawak ng pinsala.
