LUCENA CITY — Pinagsasaksak ang isang 39-anyos na babae na nagtitinda ng tuyo sa Dalahican Fish Port Complex sa Barangay Dalahican, Lucena City noong Linggo. Ayon sa ulat, ang insidente ay nag-ugat sa alitan sa lupa sa kanilang lugar.
Batay sa ulat ng Lucena City Police, nagtamo ang biktima ng maraming tama ng saksak sa balikat, braso, leeg, mukha, ulo, at kanang bahagi ng tiyan. Ang suspek ay mismong kapitbahay ng biktima.
Makikita sa CCTV footage na lumapit ang suspek sa babae at dinuduro ito bago biglang umatake gamit ang kutsilyo. Sinubukan pang pigilan ng mga lalaki sa lugar ang suspek, ngunit tuloy-tuloy ang pananaksak hanggang sa mapatalikod ang biktima sa sahig.
Lumabas sa imbestigasyon na ang motibo ng krimen ay may kinalaman sa right of way sa Purok Bangkusay 2, Barangay Dalahican. Agad na dinala ang biktima sa ospital sa Lucena City at kasalukuyang nasa stable condition habang patuloy na ginagamot.
Patuloy namang hinahanap ng pulisya ang tumakas na suspek, at nagpapatuloy ang imbestigasyon sa naturang insidente upang maiwasan ang ganitong pangyayari sa hinaharap.
