Ang away mag-asawa sa Barangay San Gabriel, Laurel, Batangas noong Linggo ng gabi, Oktubre 12, ay nauwi sa trahedya. Patay ang isang 63-anyos na ginang matapos bugbugin ng kanyang 62-anyos na mister na lasing.
Ayon sa pulisya, sinuntok, tinadyakan at hinampas ng kahoy ng suspek ang asawa. Dead on arrival ang ginang sa ospital at lumabas sa autopsy na atake sa puso ang ikinamatay.
Nadamay rin ang 13-anyos na apo ng mag-asawa. Sugatan ito matapos ring suntukin at hatawin ng kahoy ng suspek. Ang dahilan ng gulo ay pera na sana’y baon ng bata para sa buong linggo.
Ayon sa pamilya, matagal na nilang naranasan ang pananakit mula sa ama, pero nanatiling matatag ang kanilang ina para sa anim na magkakapatid. Sa presinto, una’y itinanggi ng suspek ang pananakit ngunit kalauna’y umamin at humingi ng tawad.
Kinasuhan ang lalaki ng parricide at paglabag sa Republic Act 7610 o batas laban sa child abuse.
