Ang pulisya sa Pasig City ay nagsimula ng imbestigasyon matapos kumalat ang isang viral video kung saan apat na lalaki ang puwersahang pumasok sa isang bahay at nang-harass umano ng mga nakatira sa Barangay Pinagbuhatan.
Kinumpirma ni Police Col. Hendrix Mangaldan, hepe ng Pasig Police Station, na nangyari ang insidente noong Setyembre 23. Ayon sa kanya, nagkaroon na ng beripikasyon sa social media post at nakumpirmang tunay itong naganap sa barangay.
Base sa paunang findings, hindi umano ito kidnapping case. Lumabas na magkakilala ang magkabilang panig—mga suspek at biktima—at may dati nang personal na alitan. Natukoy na ng pulisya ang mga sangkot at kinakalap na ang kanilang pahayag para sa paghahain ng kaukulang kaso.
Nalaman din na isang laruan na baril lamang ang ginamit, at hindi totoong armas. Sinabi ni Mangaldan na hindi ito gang activity kundi parang lokal na samahan na may sariling sigalot.
Posibleng kaso na isampa ay physical injuries, trespassing, at grave threats, depende sa magiging resulta ng imbestigasyon at testimonya ng mga sangkot. Tiniyak ng awtoridad na mananagot ang lahat ng may kinalaman sa insidente.
