Ang isang 21-buwan na batang babae mula Germany ay namatay matapos mahulog mula sa water slide habang kasama ang kanyang ama sa isang water park sa Lopar, Croatia.
Ayon sa ulat, nahulog ang bata mula sa taas na halos apat na metro (13 talampakan) at bumagsak sa semento. Nangyari ito noong Hulyo 22, ayon sa mga saksi. Narinig umano nilang sumisigaw ang ama ng bata ng, "Huwag ninyo akong tanungin, mamamatay ang anak ko!" habang buhat ang kanyang anak na wala nang malay.
Isang doktor ang agad rumesponde at nag-CPR para subukang iligtas ang bata bago dalhin sa ospital sakay ng helicopter. Gayunman, natuklasang may malalang pinsala sa ulo at loob ng katawan ang bata. Idineklarang patay kinabukasan.
Ayon kay Lopar Mayor Zdenko Jakuc, labis silang nalungkot at nagulat sa insidente. Sinabi ng lokal na pamahalaan na ligtas at tahimik ang lugar, at hindi pa nagkakaroon ng ganitong aksidente. Patuloy ang imbestigasyon kung ligtas ba ang slide para sa edad ng bata at kung nasunod ang mga tamang patakaran sa seguridad.
