Ang isang 16-anyos na binatilyong may autism, si John Ric Hiligan, ay nasawi matapos ma-trap sa nasunog nilang tahanan sa Joaquin Santiago Street, Bgy. Malanday, Valenzuela City noong Lunes, Enero 5. Naiwan siya sa bahay kasama ang dalawang nakababatang kapatid habang nasa Caloocan ang kanyang ina at namamasada ng jeepney ang ama.
Sinubukan ng mga kapatid na iligtas si John Ric ngunit tumanggi itong sumama at nanatili sa loob ng natutupok na bahay. Natagpuan ang kanyang bangkay sa unang palapag matapos bumigay ang ikalawang palapag kung saan siya unang na-trap.
Posibleng nagsimula ang sunog sa lighter na ginagamit ng biktima bilang pampakalma, ayon sa ama. Labis ang hinagpis ng ina, na huling nakita ang anak noong media noche, at lumapit ang pamilya sa city government para humingi ng tulong sa cremation at muling pagbangon.
Ayon sa Malanday BPSO, apat na pamilya ang nawalan ng tirahan at kasalukuyang tumutuloy sa modular tents na inilatag ng barangay. Pinapayuhan ang mga magulang na bantayan ang kanilang mga anak at iwasan ang paglalaro ng apoy.
