Ang dalawang Chinese nationals ay naaresto sa Pasay City matapos ikulong ang isang kababayan nila laban sa kanyang kagustuhan, ayon sa ulat ng NBI.
Ayon sa NBI-NCR, tumanggap sila ng reklamo noong Setyembre 9 mula sa isang Chinese na humingi ng tulong para iligtas ang kanyang kaibigan. Nakapagpadala ang biktima ng mensahe sa Telegram na siya ay pinipigilan sa loob ng isang condominium sa Pasay.
Agad na isinagawa ang rescue operation noong Setyembre 15 na nagresulta sa pag-aresto sa dalawang suspek at pagliligtas sa biktima.
Sinabi ni NBI Deputy Director Ferdinand Lavin na ang biktima ay na-recruit noong Agosto 2025 para sa isang IT position sa pamamagitan ng Telegram. Nang malaman niyang ilegal ang operasyon ng kumpanya, gusto niyang umalis ngunit pinigilan at kinumpiska ang pasaporte niya. Pinilit siyang magtrabaho at na-detain ng 15 hanggang 20 araw.
Napag-alaman na may koneksyon ang mga suspek sa dating operasyon ng Philippine Offshore Gaming Operators (POGOs). Naghain na ng kaso ng serious illegal detention laban sa kanila at nakikipag-ugnayan ang NBI sa Bureau of Immigration tungkol sa overstaying status ng mga suspek.
