Ang mag-asawa sa Sta. Cruz, Davao del Sur ay natagpuang patay nitong Agosto 20 ng madaling araw. Nadiskubre ng mga residente at awtoridad ang bangkay ng 60-anyos na ginang sa loob ng kanilang kubo, habang ang 58-anyos na mister nito ay nakita sa damuhan, halos 150 metro ang layo mula sa kanilang bahay.
Ayon sa pulisya, pinaniniwalaang minartilyo ang mga biktima. Gayunpaman, patuloy pang inaalam ang eksaktong paraan ng pagpatay. Wala umanong nawawala sa mga gamit at nanatili rin ang kanilang mga alagang hayop sa lugar.
Sinabi ni Police Staff Sergeant Arianne Tablada na wala pang malinaw na motibo sa krimen. “Sa inisyal na imbestigasyon, wala namang nawala na gamit. Ang mga hayop nila ay nandoon pa. Sa ngayon, wala pa tayong motibo at nagpapatuloy ang imbestigasyon,” ayon kay Tablada.
Patuloy ang manhunt operation ng pulisya upang mahuli ang salarin sa karumal-dumal na krimen laban sa mag-asawa.
