Ang Presidential Anti-Organized Crime Commission (PAOCC) ay nagbabala sa mga Pilipino na mag-ingat sa illegal online lending apps. Maraming nagrereklamo na ang mga utang dito ay may kasamang pananakot, harassment, at abusadong paniningil.
Ayon kay PAOCC Undersecretary Gilbert Cruz, may mga lending apps na hindi lehitimo at ginagamit ang personal na impormasyon ng mga borrower tulad ng social media accounts, contacts, at gallery para takutin sila kapag hindi nakabayad sa oras.
May mga ulat pa na ginagamit ang anak o bahay ng borrower bilang banta. Kapag na-delay ang bayad, may mga pananakot na tipong “ipapulis ka,” “patokhang,” o “pasusunog ang bahay mo.”
Sinabi ni Cruz na mas mabuting gumamit ng legit at government loan programs tulad ng GSIS, SSS, o mga kooperatiba. Pwede ring tingnan sa SEC records kung rehistrado ang isang lending app bago mangutang.
Paalala ng PAOCC: Iwasan ang illegal apps at piliin ang mga ligtas at lehitimong lending services para hindi malagay sa panganib ang pera at personal na buhay.
