Ang mga mambabatas sa Kamara ay nagpahayag ng pagkadismaya sa desisyon ng Senado na i-archive ang impeachment case laban kay Bise Presidente Sara Duterte. Bukod dito, hindi rin nila nagustuhan ang sinabi ni Senador Imee Marcos na tila minamaliit ang proseso.
Ang boto ng Senado ay pumabor sa pag-archive ng kaso matapos sundin ang utos ng Korte Suprema na pansamantalang ipatigil ang trial. Ayon kay Senador Alan Peter Cayetano, ang ibig sabihin ng pag-archive ay "patay" na ang kaso, pero maaaring buhayin kung babaligtarin ng Korte Suprema ang naunang desisyon.
Ayon kay Rep. Jude Acidre ng Tingog party-list, “Ginawa ng Kamara ang tungkulin nito at sinunod ang tamang proseso. Kung may dapat magpaliwanag, ito ay ang Senado.” Dagdag pa niya, ang hakbang ng Senado ay hindi nagbigay linaw sa isyu at hindi rin nito inalis ang tanong ng taumbayan tungkol sa katotohanan.
Binigyang-diin din ni Rep. Jay Khonghun, Deputy Speaker at kinatawan ng Zambales, na dumaan sa maayos at masusing pagtalakay ang impeachment case sa Kamara. Aniya, “Hindi basta-basta ang desisyong ito. Sinunod namin ang mga patakaran.”
Ang hamon ngayon ay para sa Senado na ipaliwanag sa publiko ang kanilang naging aksyon at harapin ang epekto ng kanilang desisyon.
