Ang DILG Secretary Jonvic Remulla ay nagsalita tungkol sa hamon ni Davao City Vice Mayor Sebastian “Baste” Duterte na suntukan laban sa PNP Chief Gen. Nicolas Torre III, na tinanggap ng opisyal. Sa panayam sa DZMM, sinabi ni Remulla na si Torre ay parang bulldog na hindi aatras sa laban.
Ayon kay Remulla, dapat sa korte inaayos ang mga sigalot at hindi sa suntukan. “Justice or settlement of disputes should not be done fist-to-fist. The rule of law must prevail at all times,” ani Remulla. Dagdag pa niya, hindi magandang ehemplo ang hamon para sa kabataan.
Pinuna din niya si Baste dahil imbes na tumulong sa mga nasalanta ng matinding baha sa Mindanao, naghamon pa ito ng suntukan. “Ngayon pa na maraming naghihirap at binaha, mas mabuti na tumulong kaysa maghamon,” sabi ni Remulla.
Nag-ugat ang galit ni Baste matapos pagbintangan si Torre na sangkot sa pag-aresto at paglipat ng kanyang ama, dating Pangulong Rodrigo Duterte, sa ICC sa The Hague. Doon haharap ito sa kasong crimes against humanity dahil sa libo-libong namatay sa war on drugs.
Sa isang podcast, hinamon ni Baste si Torre sa isang suntukan. Tinanggap ito ng PNP Chief at iminungkahing gawing charity fight para makatulong sa mga biktima ng baha.
