Ang isang 33-anyos na ina at ang kanyang 1 taon at 5 buwang gulang na anak ay natagpuang patay sa loob ng kanilang inuupahang kwarto sa Sitio Nangka, Barangay Barrio Luz, Cebu City, nitong Huwebes ng hapon, Hulyo 17, 2025.
Ayon sa imbestigasyon ng Mabolo Police Station, kamakailan lang lumipat sa lugar ang mag-ina mula sa Bogo City. Nakuha sa loob ng kwarto ang isang ID na may pangalang “Laviña Mendoza,” na ngayon ay ginagamit para kumpirmahin ang pagkakakilanlan ng ina.
Nadiskubre ang insidente nang anak ng may-ari ng bahay ay pumunta sa kwarto para ayusin ang kuryente. Nakabahala sa kanya ang masangsang na amoy, kaya humingi siya ng tulong sa mga opisyal ng barangay.
Kasama ang isang kagawad, sapilitang binuksan ng barangay personnel ang pinto. Natagpuan nila ang batang patay na at nagsisimula nang mabulok, nakahiga sa double-deck na kama. Samantalang ang ina ay nakita ring wala nang buhay, nakabigti sa tali malapit sa kama.
Patuloy pa rin ang imbestigasyon ng pulisya para malaman kung may nangyaring foul play o kung ito ay isang kaso ng suicide at pagkamatay sa kapabayaan.
