Ang isang sanggol na walong buwan pa lamang ang edad ay namatay matapos mabangga ang kanilang sinasakyang traysikel sa isang motorsiklong nadulas sa Barangay Sulangan, Dumangas, Iloilo nitong Lunes ng umaga. Karga ng kanyang tiyuhin ang sanggol habang nasa traysikel.
Ayon sa CCTV footage, bigla umanong nadulas at natumba ang motorsiklo sa kalsada, dahilan para direktang mabangga nito ang kasalubong na traysikel. Sa lakas ng salpukan, tumilapon ang mga sakay ng traysikel at nabitiwan ng tiyo ang sanggol na nahulog sa kalsada.
Dead-on-arrival ang sanggol sa ospital habang ang ibang sakay ng traysikel ay nagtamo lang ng minor na sugat. Isinugod din sa ospital ang 15-anyos na drayber ng motorsiklo na ngayon ay nasa pangangalaga na ng MSWDO (Municipal Social Welfare and Development Office).
Patuloy ang imbestigasyon ng mga pulis at kinakausap ang pamilya ng sanggol tungkol sa mga susunod na hakbang laban sa menor de edad na drayber.
