Ang Pangulo ng Estados Unidos na si Donald Trump ay magpapatupad ng 20% na taripa sa lahat ng produkto galing Pilipinas simula Agosto 1, 2025. Ayon sa liham na ipinadala niya kay Pangulong Ferdinand Marcos Jr., sinabi niyang hindi patas ang ugnayang pangkalakalan ng dalawang bansa.
Nag-post si Trump ng kopya ng liham sa Truth Social kasama ang babala: kung magtaas ng taripa ang Pilipinas bilang sagot, idadagdag ito sa 20% na singil ng US. Halimbawa, kung magtaas ang Pilipinas ng 5%, magiging 25% ang kabuuang taripa ng US sa ating mga produkto.
May inaalok na exemption si Trump sa mga kumpanyang handang ilipat ang operasyon sa Amerika, at sinabing mabilis lamang ang pag-apruba ng mga papeles. Mas mababa ang taripa ng Pilipinas kaysa sa ibang bansa sa Southeast Asia gaya ng Cambodia at Thailand na may 36%.
Paliwanag ni Trump, matagal nang hindi patas ang taripa at patakaran ng Pilipinas, na nagdulot ng malaking trade deficit na tinawag niyang banta sa ekonomiya at pambansang seguridad ng US. Bukod sa Pilipinas, may ipinataw ring 50% taripa ang US sa mga import mula Brazil at copper products.
Noong Abril, unang inihayag ni Trump ang 17% taripa pero na-delay ito dahil sa 90-day negotiation period. Ayon sa bagong pahayag niya, wala nang extension – tuloy na ito sa Agosto. Samantala, sinabi ng Malacañang na minimal lamang ang epekto ng 17% na taripa noon at tinatanggap nila ito bilang respeto sa ugnayan ng Pilipinas at Amerika.
