Ang mga kongresista ay naghahain ng panukala na maghihigpit sa paggamit ng e-wallet apps sa online gambling. Ayon kay Rep. Jonathan Keith Flores ng Bukidnon, masyado nang madaling magsugal online gamit lang ang e-wallet, kaya parami nang parami ang nalululong, lalo na ang mahihirap.
Sinabi ni Flores na ang mga e-wallet platforms ay nagiging daan para sa adiksyon. Hindi raw siya laban sa e-wallets, pero dapat tanggalin ang direktang links papunta sa gambling apps. May ilang e-wallet pa raw na nag-aalok ng pautang bukod sa top-up options, na lalo lang nagpapalala sa sitwasyon.
Dagdag niya, maraming pamilya ang naapektuhan na dahil sa online gambling. May kabataan at mga breadwinner na nalulubog sa utang, at minsan ay nauuwi pa sa pagnanakaw. Kaya ang gusto niya, pahirapan nang kaunti ang proseso ng paglo-load sa gambling sites para hindi ito maging sobrang accessible.
Hindi pa ito total ban, sabi ni Flores, pero kung lalala pa ang sitwasyon, maaaring maghigpit pa ang Kongreso. Hinikayat din niya ang BSP at SEC na imbestigahan ang mga e-wallet apps na konektado sa online gambling.
Samantala, si Rep. Rolando Valeriano ng Maynila ay mas mahigpit ang panukala. Gusto niyang ipagbawal ang online gambling at kanselahin ang mga lisensya ng operators. Para sa kanya, dapat onsite lang ang sugal, sa ilalim ng regulasyon ng PAGCOR o GAB.