Ang sunog ay nangyari sa ikalawang palapag ng isang paupahang bahay sa Zambales Street, Brgy. San Martin de Porres, Quezon City nitong madaling araw ng Miyerkules. Umabot ito sa unang alarma at agad na rumesponde ang 13 fire trucks.
Ayon kay SF04 Rolando Valena, taga-imbestiga ng sunog mula QC Bureau of Fire Protection (BFP), natagpuan ang isang lalaking bangkay sa kama. Gawa sa kahoy at yero ang palapag, at may mga partition na light materials kaya mabilis na kumalat ang apoy.
Isa pang lalaki, 43 taong gulang, ang nagtamo ng mga paso sa balikat at braso. Agad naman siyang nilapatan ng lunas ng medic team.
Ayon kay Jennifer, 30-anyos na tenant, “Akala ko may nag-iihaw. Pagbukas ko ng pinto, sumalpok agad ang apoy sa mukha ko. Nasunog pa ang buhok ko kaya agad akong tumakbo pababa.”
Naapula ang apoy bandang 2:20 a.m., at kasalukuyang iniimbestigahan pa ng BFP ang sanhi ng sunog at ang kabuuang pinsala. Paalala ng BFP: I-unplug ang mga gamit sa kuryente kapag hindi ginagamit upang maiwasan ang sunog.
