Ang pamilya Buss ay papasok sa isang kasunduan para ibenta ang majority stake sa Los Angeles Lakers, ayon sa ulat ng ESPN. Ang halaga ng team ay tinatayang nasa $10 bilyon, ang pinakamataas na bentahan sa kasaysayan ng professional sports.
Si Mark Walter, CEO ng TWG Global at may-ari ng mga shares sa Dodgers at Sparks, ang kukuha ng karamihan ng pagmamay-ari. Sa kasaysayan ng NBA, ito ang magiging pinakamahal na pagbili ng isang koponan, na tinalo ang naunang record ng Boston Celtics na nabenta sa $6.05 bilyon nitong Marso.
Ang yumaong si Jerry Buss ang bumili ng Lakers noong 1979 at ginawang isa sa mga pinakasikat na sports team sa buong mundo. Sa ilalim ng kanyang pamumuno, nanalo ang Lakers ng limang championships noong dekada '80.
Pagkatapos ng kanyang pagkamatay noong 2013, si Jeanie Buss ang naging pangunahing may-ari. Ayon sa ESPN, mananatili siya bilang governor ng team kahit matapos ang bentahan.
Nagbigay din ng mensahe si Magic Johnson, dating bituin at executive ng Lakers. Aniya, "Si Mark Walter ay isang lider na uhaw sa tagumpay at kalidad. Naniniwala akong kaya niyang ipagpatuloy ang tagumpay at pangalan ng Lakers."
