Ang mag-asawang sina Ronald Rivera at Shielan Criscel Rivera, parehong 34 anyos, ay naaresto sa Calintaan, Occidental Mindoro dahil sa pagkakasangkot sa isang P5 bilyong investment scam. Kasama rin nilang nahuli ang kanilang sekretarya na si Apply Joy Templo, 29 anyos, na unang nadakip sa Balayan, Batangas. Si Templo ay Top 5 sa most wanted list ng Batangas dahil sa kasong syndicated estafa.
Ayon kay Major Charlie Reyes ng Cuenca Police, matagal na nilang binabantayan ang kilos ng mag-asawa mula nang makumpirma ang arrest warrant. Kahit may mga reklamo na laban sa kanila sa Batangas, nakapagtayo pa sila ng batching plant sa isang liblib na lugar sa Mindoro. Ginamit nila ito bilang opisina sa araw, at dito nila ipinagpatuloy ang operasyon.
Nanghikayat umano ang mag-asawa ng mga investor mula sa Batangas (lalo na sa Lipa at Cuenca), Metro Manila, at Hilagang Luzon. Pinangakuan ang mga biktima ng malaking tubo, gaya ng P500,000 na babalik ng P1 milyon sa loob lang ng ilang araw. Upang makumbinsi ang mga investor, ipinasyal pa sila sa planta at ipinakita ang mga dokumento gaya ng purchase orders at contracts. Pero kalaunan, hindi na naibalik ang puhunan at tumalbog ang mga tseke.
Ayon kay Atty. Francis Sabili, legal counsel ng ilan sa mga biktima, ang negosyo ay mukhang lehitimo sa simula dahil totoong batching plant ang ipinakita. Pero kalaunan, lumabas na modus lang ito para makaipon ng milyong pisong halaga. Marami sa mga nabiktima ay negosyante, lokal na opisyal, at ordinaryong mamamayan. Sa taya ng mga dokumentong isinumite, aabot sa P5 bilyon ang kabuuang halaga ng naloko mula sa mga investor.
Sa ngayon, tatlong kamag-anak pa ng mag-asawa ang pinaghahanap ng pulisya dahil pinaniniwalaang kasabwat sa scam. Walang piyansa ang kasong isinampa laban kina Ronald, Shielan, at Apply Joy. Tumangging magbigay ng pahayag ang mga suspek sa media. Patuloy pa rin ang imbestigasyon lalo’t may mga proyekto pa ang batching plant sa Mindoro.
