Ang 100 Chinese nationals ay dineport pabalik sa Shanghai, China nitong Martes ng umaga. Ito ay bahagi ng pagtutulungan ng PAOCC (Presidential Anti-Organized Crime Commission) at Bureau of Immigration para sugpuin ang mga illegal na POGO at scam operations sa bansa.
Ayon sa mga otoridad, ang mga Tsino ay naaresto sa mga lugar tulad ng Lapu-Lapu City (Cebu), Silang (Cavite), Parañaque, at Pasay simula pa noong nakaraang taon. Umabot na sa 4,000 ang kabuuang bilang ng mga dineport na Chinese POGO workers.
Pinuri ni Usec. Gilberto Cruz ang pakikipagtulungan ng Chinese embassy na siyang gumastos sa kanilang pag-uwi. Ayon pa sa kanya, halos 1,000 Chinese citizens na ang nabiktima ng mga scam operations sa Pilipinas, kaya't nagpapasalamat daw ang China sa aksyon ng gobyerno.
May mga inaasahan pang susunod na deportation, at posibleng umabot sa mahigit 100 pang tao ang isusunod. Ibinunyag din ni Cruz na mahirap minsan matukoy ang totoong pagkakakilanlan ng mga dayuhang sangkot, dahil sa paggamit nila ng maraming pangalan.
Sasamahan ni Cruz ang grupo sa China at makikipagpulong sa mga Chinese officials para palakasin ang cooperation laban sa transnational crimes, lalo na sa mga kasong may kinalaman sa money laundering. Nais din ng Pilipinas na matuto sa kanilang skills at investigation training upang mas mapabuti ang operasyon kontra illegal na aktibidad.
