Ang isang 9 na taong gulang na batang lalaki mula sa Malapatan, Sarangani ay namatay dahil sa rabies matapos makagat ng ligaw na aso. Noong Mayo 18, 2025, habang naglalaro, nakagat siya ng aso ngunit hindi agad sinabi sa kanyang mga magulang, kaya hindi ito nabigyan ng tamang lunas.
Lumala ang sitwasyon noong Hunyo 9, nang magsimulang lumabas ang mga sintomas ng rabies gaya ng takot sa tubig, panghihina, at pagkakaroon ng guni-guni. Sa puntong iyon, isang dose lang ng anti-rabies vaccine ang naibigay, ngunit ayon sa health office, huli na ang lahat.
Ayon kay Dr. Alvin Alejandro ng Sarangani Provincial Health Office, kapag ang virus ng rabies ay umabot na sa utak, hindi na ito malulunasan kahit gaano pa karami ang pera mo. "Mamamatay talaga ang pasyente," ani ng doktor.
Matapos ang insidente, nalaman na ang aso ay kinatay at kinain ng halos 30 residente. Dahil dito, lahat ng kumain ay isinailalim sa quarantine at binakunahan laban sa rabies bilang pag-iingat.
Ang insidenteng ito ay paalala na dapat agad na ipaalam ang kagat ng hayop at kumpletuhin ang bakuna upang maiwasan ang ganitong trahedya.
