Ang isang 34-anyos na babae ay namatay matapos siyang barilin ng riding-in-tandem sa Barangay Marulas, Valenzuela City nitong Huwebes ng gabi. Ayon sa CCTV, habang naglalakad ang biktima sa gilid ng kalsada sa F. Bautista Street, pinaputukan siya ng lalaking naka-angkas sa motorsiklo. Bumaba pa ang suspek at muling binaril ang biktima bago mabilis na tumakas.
Sabi ni PMaj. Randy Llanderal ng Valenzuela Police, apat o higit pa ang tama ng bala sa ulo at katawan ng babae. Patay agad sa pinangyarihan ang biktima na umano’y may kikitain sana sa kanto ng Marulas.
Sa imbestigasyon ng pulisya, lumabas na ang biktima ay may dating kaso sa ilegal na droga at kakakalaya lamang noong nakaraang taon. Posibleng may kaugnayan ang krimen sa isang transaksyong hindi nabayaran ayon sa isang saksi.
Ayon naman sa Barangay Marulas, dati na ring may reklamo ang biktima sa pagnanakaw pero may mga kasunduan umano na hindi na niya ito uulitin. Dahil sa insidente, pinaigting na ang seguridad sa lugar.
Patuloy ang backtracking ng pulisya sa CCTV para makilala ang mga salarin. Mayroon na umanong person of interest, at humihiling ang mga awtoridad ng tulong mula sa publiko kung may impormasyon tungkol sa pamamaril.
