Ang higit 1.2 toneladang shabu na narekober mula sa karagatan ng Luzon ay tinatayang aabot na sa halagang P8.8 bilyon, ayon sa pahayag ng Philippine National Police (PNP) ngayong Martes.
Ayon kay PNP spokesperson Brig. Gen. Jean Fajardo, nakumpiska ang 66 sako ng ilegal na droga na natagpuan sa dagat ng Masinloc (Zambales), Santa Cruz (Ilocos Sur), at ilang bahagi ng Pangasinan. Pinakabago sa pagkakadiskubre ay ang 25 kilong sako ng shabu sa Magsingal, Ilocos Sur.
Sinabi ni Fajardo na magkakapareho ang packaging ng mga droga kaya pinaniniwalaang galing ito sa isang sindikato, na posibleng konektado sa Golden Triangle syndicate. Naanod umano ito sa magkakaibang lokasyon dahil sa masamang panahon.
Dagdag pa niya, may pangangailangang palakasin ang coastal patrol sa tulong ng PNP Maritime Group, Coast Guard, at Navy para labanan ang droga sa karagatan.
Bilang gantimpala, P100,000 at mga sako ng bigas ang naipamahagi sa mga mangingisda sa Bataan na unang nakadiskubre ng shabu. Sinisigurado ng pamahalaan na may insentibo rin ang mga mangingisda mula Ilocos at Pangasinan.
