Ang JoyRide ay buong pusong nakikipagtulungan sa mga awtoridad kaugnay ng pagkawala ng isa sa kanilang TNVS driver na si Raymond Cabrera. Nawawala siya mula pa noong Mayo 18, 2025 matapos maghatid ng pasahero sa Bacoor, Cavite.
Ayon sa pahayag ng JoyRide, prioridad nila ang kaligtasan ng kanilang mga driver, partner, at pasahero. Agad nilang ibinigay sa mga awtoridad ang lahat ng impormasyon tungkol sa biyahe na may kinalaman sa kaso.
Patuloy na nananatiling bukas ang JoyRide sa pakikipagtulungan sa imbestigasyon para masigurong maging mabilis at makatarungan ang pagresolba sa kaso.
Si Cabrera ay huling nakitang buhay matapos sumundo ng pasahero sa isang casino hotel sa Parañaque City noong madaling araw ng Mayo 18.
Pagkalipas ng dalawang araw, nakita ang kanyang sasakyan na may bakas ng dugo sa harap ng isang convenience store sa Malanday, Valenzuela City. Kasalukuyang hawak ng NBI ang kaso.
