Ang ika-6 sa top most wanted ng Pasig City ay naaresto ng mga pulis kamakalawa ng gabi dahil sa kaso ng carnapping. Kinilala siya sa alyas na “Joel”, 35 taong gulang, isang construction worker at nakatira sa Barangay Rosario, Pasig City.
Ayon sa ulat, nahuli si alyas Joel sa isinagawang operasyon ng Follow-up Section kasama ang Rosario Police Sub-Station 7. Matagal na umano siyang tinutugis ng mga awtoridad.
May inilabas na arrest warrant laban kay Joel mula sa Pasig Regional Trial Court Branch 166. Ang kaso niya ay may kaugnayan sa Republic Act No. 10883 o mas kilala bilang New Anti-Carnapping Act of 2016.
Itinakda ang piyansa sa halagang ₱300,000. Kasalukuyang nasa kustodiya ng Pasig City Police ang suspek habang inaasikaso ang proseso ng kanyang kaso.
Patuloy ang paalala ng pulisya sa publiko na maging alerto at makipagtulungan sa mga awtoridad upang mahuli ang mga sangkot sa krimen.
