Ang dating mayor ng Bamban, Tarlac na si Alice Guo ay sinampahan ng Department of Justice (DOJ) ng 62 kaso ng money laundering. Kasalukuyan siyang nakakulong sa Pasig City Jail dahil din sa 26 na kaso ng paglabag sa Anti-Money Laundering Act (AMLA).
Nahaharap din siya sa 5 karagdagang kaso sa ilalim ng Section 4 (b) ng parehong batas. Ito ay dahil sa umano'y pag-convert, paglilipat, at paggamit ng pera o ari-arian na galing sa ilegal na gawain.
Kasama sa kaso ang kanyang mga magulang na sina Jian Zhong Go at Lin Wenyi, pati na rin ang kanyang mga kapatid na sina Shiela at Seimen, at 26 na iba pa na sangkot sa Philippine Offshore Gaming Operators (POGO) operation sa Baofu compound.
Ayon sa 48-pahinang resolution ng DOJ, ang kinita mula sa POGO operation ay inilipat umano sa ibang legal na negosyo ng pamilya Guo. Noong 2023, ni-raid ng mga otoridad ang nasabing lugar at naaresto ang 300 dayuhan, karamihan ay Chinese.
Noong Marso 13, 2024, muling sinalakay ang compound dahil sa mga ulat ng labor trafficking, crypto scams, love scams, at investment fraud. Kinumpirma ni Prosecutor General Richard Anthony Fadullon na naisampa na ang kaso sa korte sa Capas at inilabas ang resolution noong Enero.
