Ang isang 61-anyos na babae na si Rosemarie Orcine ay nasawi matapos masagasaan ng tatlong magkaibang sasakyan habang tumatawid sa kalsada sa Bgy. Silangan, Quezon City noong gabi ng Mayo 17. Sa CCTV, makikitang tumatawid si Orcine sa Illinois Street at Aurora Boulevard pasado alas-7 ng gabi nang siya ay mabundol ng isang itim na MPV. Pagkalipas ng ilang segundo, nasagasaan pa siya ng isang puting SUV at isa pang kotse na kinakaladkad pa siya.
Ayon sa pulisya, nakita sa isa pang CCTV na bumaba ang driver ng MPV para silipin ang kanyang sasakyan pero umalis din agad. Ang SUV ay dumiretso lang at hindi huminto. Ang driver ng kotse na huli sa pagkakasagasa ay nasa custody na ng QCPD. Sinabi nito na hindi raw niya agad napansin ang aksidente at nagulat lang nang makita na may tao sa ilalim ng sasakyan.
Nagdadalamhati ang anak ng biktima na si Katrina Orcine. Ayon sa kanya, masama ang loob nila dahil hindi agad tinulungan ng unang nakabundol ang kanyang ina. Nakiusap siya sa driver ng MPV na panagutan ang insidente at sana ay tumulong na lang agad. Patuloy pa rin ang imbestigasyon ng QCPD para matukoy ang iba pang driver. Hinihikayat ang sinumang may impormasyon na tumawag sa QC Helpline 122.
