Ang KTM ay ligtas na muli mula sa bingit ng pagkakalugi! Dumating na ang ₱36 bilyon (orihinal na €600 milyon) na pinansyal na tulong, tatlong araw bago ang May 23 deadline ng kanilang restructuring plan. Dahil dito, makakabayad na sila ng 30% sa mga creditors at makakaiwas sa tuluyang pagsasara ng tatlong kumpanya sa ilalim ng KTM.
Ayon sa parent company na Pierer Mobility, ang pondo ay tutugon sa mga kinakailangang bayad para mapatupad ang court-approved restructuring plan ng KTM AG, KTM Components GmbH, at KTM R&D GmbH. Ang natitirang 70% ng kabuuang ₱135 bilyon (orihinal na €2.25 bilyon) utang ay papatawarin bilang bahagi ng kasunduan. May posibilidad na ang partner nilang Bajaj Auto mula India ang tumulong, matapos nitong makalikom ng ₱33.96 bilyon (orihinal na €566 milyon) kamakailan.
Bagama’t magandang balita ito para sa motorsiklong ‘Ready to Race,’ hindi maikakaila ang hirap na pinagdaanan nila. Mahigit 1,850 trabaho ang nawala, bumaba ang benta ng halos 60,000 units, at iniwan na rin nila ang bicycle market. Sa susunod na hakbang, ide-deposito na ang ₱36B at inaasahang aaprubahan na ng korte ang buong plano sa Hunyo.
