Ang dating nobyo ay naaresto matapos bantaan ang ex-girlfriend na ikakalat ang kanilang pribadong video kung hindi siya makikipagbalikan. Ayon sa ulat ng NBI-Organized and Transnational Crime Division, nagsampa ng reklamo ang babae matapos makatanggap ng sunod-sunod na pananakot mula sa lalaki.
Nalaman ng babae na may ibang karelasyon ang lalaki habang nasa ibang bansa, kaya siya nakipaghiwalay. Ngunit pagbalik ng lalaki sa Pilipinas, pinilit niyang makipagbalikan at nagbanta pa na ilalabas ang kanilang sex video. Ayon sa NBI, hindi alam ng babae na palihim siyang kinunan habang nagtatalik sila.
Sa entrapment operation ng NBI, nahuli ang lalaki sa loob ng isang coffee shop. Nakuha sa kanyang gadget ang mga sensitibong video ng biktima. Bagaman hindi niya diretsong inamin ang mga paratang, humingi siya ng tawad sa biktima at sa pamilya nito.
Sinampahan siya ng mga kasong paglabag sa Anti-Photo and Video Voyeurism Act at sa Cybercrime Prevention Act dahil sa banta at panggigipit. Pinagsisisihan daw niya ang kanyang ginawa at handang pagbayaran ang mga ito.
