Ang TWICE ay handa na para sa isang bagong kabanata! Sa teaser video na pinamagatang “INTRO: FOUR,” makikita ang walong miyembro na nakasuot ng pare-parehong asul na outfit na may salitang “four” sa kanilang palda. May kasama itong mabilis na beat na posibleng magpahiwatig ng tunog sa bago nilang album.
Wala pang eksaktong petsa ang inilalabas na comeback, pero kumpirmado nang darating ito ngayong Hulyo. Ito ang magiging ika-apat nilang full-length album matapos ang “Formula Of Love: O+T = <3” noong 2021, kung saan sumikat ang mga kantang “The Feels” at “SCIENTIST.”
Noong Disyembre 2024, bumalik ang TWICE sa music scene sa pamamagitan ng mini-album na “Strategy,” na tampok ang rapper na si Megan Thee Stallion. Nakipag-collab din sila kay Megan para sa remix ng kantang “Mamushi” at bagong bersyon ng “WE PLAY” ng Coldplay.
Pumalo ang “Strategy” sa No. 4 sa Billboard 200 at ang title track nito ay umabot sa No. 25 sa Billboard Philippines Hot 100. Bukod pa rito, bumisita rin ang grupo sa Pilipinas para sa isang special fanmeet na hatid ng Oishi at nakausap nila ang Billboard Philippines para pag-usapan ang kanilang 9 na taong anibersaryo bilang grupo.
Kaya mga ONCE, maghanda na — malapit nang bumalik ang Nation’s Girl Group na may panibagong musika at paandar!
